ཚེ་སྲོག་གི་མཆོད་མེ།

ཚེ་སྲོག་གི་མཆོད་མེ། 
                                                                                  གཅན་འོད་འབར།

རིན་བྲལ་སྲོག་གིས་སྒྲོན་པའི་མེ་ལྕེ་དམར་པོ།།
གནམ་སའི་མཚམས་ནས་མཆེད་པ་མིག་གིས་མཐོང་ན།།
སྡུག་གི་མུན་པ་འཐིབས་པའི་བོད་ཡུལ་ལྗོངས་ལ།།
སྐྱིད་ཀྱི་ཉི་མ་བསུ་བའི་སྟབས་གོམ་ཨེ་བྱ།།


འདི་ཕྱིའི་སྐྱབས་མགོན་མ་མཇལ་ལོ་ཟླ་འདས་ཀྱང་།།
མཛའ་བརྩེའི་སྤུན་གྲོགས་མ་རིག་ཉིན་མཚན་སོང་ཡང་།།
རྣམ་དག་དད་སེམས་གཙང་མའི་སྨོན་འདུན་གསེང་ན།།
སླར་འཛོམས་རེ་སྒུག་དྲོན་མོའི་སེམས་པ་ལྷག་འདུག།

རྒྱང་རིང་བརྩེ་བའི་ཨ་ཇོ་ས་མཐར་མ་བཞུགས།།
ཐག་རིང་དུངས་བའི་ཨ་ཅེ་བྱེས་ལ་མ་ཆགས།།
ཤུལ་གྱི་སྤུན་ཟླས་ཚེ་སྲོག་འབེན་ལ་བཙུགས་སྟེ།།
རེ་བའི་མིག་ཟུང་ཁྱོད་ཚོའི་ཕྱོགས་ལ་གཏད་ཡོད།།

སྦྲ་ནག་དྲོན་མོའི་ཆོན་ཐག་མེ་རུ་འབར་དུས།།
གཡག་རོག་དཀར་པོའི་ཐུགས་ནས་སྐྱོ་བ་ལྷང་ལྷང།།
སྤང་ལྗོངས་སྔོན་མོའི་མེ་ཏོག་རླུང་གིས་འཁྱེར་དུས།།
ཕྱེ་ལེབ་དམར་པོའི་མིག་ནས་མཆི་མ་ཤམ་ཤམ།།

སྡུག་གི་རླུང་འཚུབ་དྲགས་པའི་ཕ་ས་མ་ཡུལ།།
སྐྲག་དངངས་ཚེར་མས་གཙེས་པའི་ཕུ་ནུ་མིང་སྲིང།།
ཞི་བདེའི་གནས་མལ་དབེན་ཡང་ཤ་ཞེན་བརྟན་པོས།།
རྒྱལ་ཁའི་ཁ་ཕྱོགས་སྙེག་པའི་ཚུལ་དེ་བརྗིད་པ།།

གངས་རི་དཀར་པོའི་ཞིང་ལ་སྨོན་ལམ་རྒྱབ་ཡོད།།
གྲུ་འཛིན་ཕོ་བྲང་མདུན་ལ་དུས་ཆད་བཏབས་ཡོད།།
གཙང་ཆབ་སྔོན་མོའི་འགྲམ་ལ་འཛོམས་རྒྱུ་བྱས་ཡོད།།
རང་དབང་ཉིན་མོ་ཞིག་ལ་རེ་སྒུག་བྱས་ཡོད།།

སྐྱབས་སའི་ལྷ་ཞིག་ཡོད་ན་སྤྱན་གྱིས་གཟིགས་རོགས།།
བཀུར་སའི་དཔོན་ཞིག་ཡོད་ན་ཕྱག་གིས་སྐྱོང་རོགས།།
བརྩེ་པའི་གྲོགས་ཤིག་ཡོད་ན་ལན་ཞིག་གནང་རོགས།།
ཕུ་ནུའི་ལས་དབང་སྐྱ་མོ་བརྗེད་དུ་མ་འཇུག།།

༢༠༡༢།༡༡།༩ མཚན་མོར་རང་ཤག་ཏུ་བྲིས་པ་དགེའོ།