བུ་མོ་ལགས། སྒྲོལ་དཀར་ལྷ་མོ།
(གཞས་ཚིག)
ཆར་བ་སིམ་སིམ་འབབ་པའི་ཉིན་མོ་ཞིག་ལ།
རླུང་བུ་ཟ་ཟི་གཡུག་པའི་ཉིན་མོ་ཞིག་ལ།
གློ་བུར་འཕྲད་པའི་བུ་མོ་སྒྲོལ་དཀར་ལྷ་མོར།
བརྩེ་བའི་མིག་ཞགས་ཐོག་མ་ལྷོད་ཀྱིས་འཕངས་ནས།
དགའ་བའི་འཛུམ་མདངས་ཐོག་མ་ངང་གིས་བསྟན་ཡོད།
བུ་མོ་ལགས། སྒྲོལ་དཀར་ལྷ་མོ།
ང་ཡི་སེམས་ནས་དགའ་སའི་མེ་ཏོག་ཡིན།
ང་ཡི་ཡིད་ནས་དུངས་སའི་མཛའ་མོ་ཡིན།
ང་ཡིས་དྭངས་གཙང་བརྩེ་སེམས་ཁྱོད་ལ་འབུལ་དུས།
ཁྱོད་ཀྱིས་འགྱུར་མེད་དམ་བཅའ་ང་ལ་བཅོལ་བྱུང།
ཁྱོད་ནི་ང་ཡི་ཡོད་ཚད་ཡིན།
ང་ནི་ཁྱོད་ཀྱི་ཡོངས་རྗོགས་ཡིན།
ཨོ་་་་སྙིང་སྡུག་སྒྲོལ་དཀར་ལྷ་མོ།
ཁྱོད་ནི་ང་ཡི་སྙིང་གི་ཚིལ་ལུ་དཀར་པོ།
སྡོང་ལོ་ཧྲག་སེ་འཐོར་བའི་མཚན་མོ་ཞིག་ལ།
སྐར་མདའ་ཤག་སེ་ལྷུང་བའི་མཚན་མོ་ཞིག་ལ།
མཐའ་མར་མཇལ་བའི་བུ་མོ་སྒྲོལ་དཀར་ལྷ་མོས།
སྐྱོ་བའི་མིག་ཆུ་མཐའ་མ་ང་ལ་བྱིན་ནས།
སྡུག་གི་རྨ་ཁ་ཐོག་མ་ང་ལ་བཞག་ཐལ།
བུ་མོ་ལགས། སྒྲོལ་དཀར་ལྷ་མོ།
ང་ཡི་སེམས་ན་འཚར་བའི་སྐར་ཆེན་ཡིན།
ང་ཡི་མིག་ལ་མཛེས་པའི་སྙིང་སྡུག་ཡིན།
འགྱུར་མེད་དམ་བཅའ་གཡོ་སྒྱུའི་ཚིག་གིས་བཅོམས་དུས།
ལྷད་མེད་བརྩེ་སེམས་གྱེས་བྲལ་རླུང་གིས་འཁུར་སོང་།
ཁྱོད་ནི་ང་ཡི་དྲན་ཤིང་ཡིན།
ང་ནི་ཁྱོད་ཀྱི་བརྗེད་བྱང་ཡིན།
ཨོ་་་་མཛའ་མོ་སྒྲོལ་དཀར་ལྷ་མོ།
ཁྱོད་ནི་ང་ཡི་སེམས་ཀྱི་ཐིག་ལེ་ནག་པོ།
༢༠༡༢།༦།༤
No comments:
Post a Comment